PRESENTAZION DEI BERSALLIERI, VENARE 5 SETEMBRE AL BATTALLINI AE 18.30

Bonasera amizi dea Rebi Rovigo e del rebi.

A gò da dire ca sò omo feice e che finalmente ea società ea s’è drio fare dee bee robetine. Ma quanti ani iera che no se podeva pasare l’istà bei e pacifici come ‘desso?  Ghe s’è schei, no ghe s’è schei, ghe s’è ea società, ea società ‘ndemo a zercarla a “Chi cheo gà visto”, i tosi i s’è boni, i tosi i s’è brochi… ‘Sto ano inveze….

I m’ha cuntà che el bocia Bacheti ormai l’è deventà un veteran e l’è drio introdure tuti chealtri bocia novi in tel grupo e anca in tea vita sociae dea cità. Osteria, che bravo fioeo!  Però… se gò da pensare ai bocia novi, a me vien in a mente Vaerio Vicerè: no, parchè co’ un nome cussì… a me ’speto che’l meta tuti i aversari inzenocià, zio imperiae!

I m’ha anca cuntà che i veci i s’è bei cuntenti de stare qua in tea tera del formenton. El Germano Reae, par esempio, l’è deventà italian e el Legorin el gà fin sfornà ‘na putina (va bon, no l’è chea gabia sfornà propio lu medesimo!). A gò anca incontrà, mentre ca iero drio tore un fià de parsuto de San Daniee, un tochetin de pecorin stagionà e del tono sfuso da Tenuta, Luca Maoni. “Chea strazona!-ghe gò dito-A te te sì cussì smagrà ca te pudarissi fare el modeo pal sior Armani!”. E el gà ‘na scavejara, zio Glemur paruchieri! Però i m’ha cuntà che’l core, el toso, l’è beo in forma.

Va bon, lassemo perdare, mi a voevo soeo domandare chi ca cusinarà al terzo tempo ca se farà venare al campo dopo ea presentazion dea squadra (i ghe sarà propio tuti, da Schinca Bruneo a Pepe Scana, dai veci zugadori ai novi, aea presidentesa dona de rebi). Ciò, Susi, a proposito! Cusinito ti? O vienlo Nino Rossi direto dae Granze co’ ‘na scargà de brasoe? Speremo de no scoearse soeo dei butilioni de vin, ma de sgionfarse anca un fiantenin co’ dea porcheta o del saeame co’ l’aio. A me auguro de vedare tanta zente da Rovigo, venare 5 setembre al Battallini ae dicioto e trenta: presentazion dei Bersallieri e dea società.

Mi a porto ‘na panzeta, ma sempre co’ l’aio.

Ve saeudo, Omo de Rebi