I ingredienti.

Dodese grami de lievito de bira (no soeo de bira, no stasì fare i furbi)

200 grami de farina

40 grami de ua (ma “uva passa”, insoma, ueta)

40 grami de pinoi

40 grami de zedrini canditi

350 grami de oio de semi (che ghe n’è pien el mondo) zirca

40 grami de zucaro semoeà

16 grami de zucaro a veo

… e qua riva el beo… o,5 centiitri zirca de grapin o rum!

EA PREPARAZION

Siolliere in t’un rezipiente concavo el lievito de bira con un fià de acqua caldina e el zucaro; zontare ea grapa e anca ea farina, sgnacandoghe anca dea acqua. Lavurare ben el paston finchè no se forma più e boesine de aria in te superficie, po coerzare tuto co’ un tovalliolo e far lievitare in t’un bel postein caldin.

Quando che el paston el se gavarà radopià, triplicà, quadruplicà e via discorendo, cazonare l’ueta, i zedrini trità e i pinoi, po sfrizegare in ollllio caldo e scoeare e fritoe su carta asorbente, metarle su un bel piato da portata dandoghe ea forma dea piramide de Cheope o anca Micerino, spolverarle col zucaro a veo e servirle ancora bee calde.

SE CONSILLIA. De magnarle.

PAR CHI CA NO S’è CUSSì STUDIà. ‘Sta bona ricetina qua ea iera del sior Bartolomeo Scappi, cogo de Pio V. In tel Setezento ea fritoa s’è deventà dolze nazionae del Stato Veneto, pensè voialtri.

Ve saeudo, Omo de rebi

Mi me domando e digo: cossa s’è ca scata in tea mente umana quando ca se partorisse un’idea come quea del Bersallioto? Sicome ca so’ un bon omo, a me informo par darghe al sior Toni Paga(no) el numaro de un con speciaista. Magari co’ ‘na simpatica seduta de grupo.

Ma intanto el dano l’è fato e mi a gò za sentio i sbigatamenti dee risate dei siori padovani fin qua da l’Adese. Anca se anca lori i taca a preocuparse, parchè se in te ‘na Rovigo ‘riva dee idee cussì… voe propio dire che’l rebi itallian l’è drio finire in tea cuora.

Mi a gò messo za dò, tre pomidori a smarzare. Cussì i sarà bei che pronti pa’l Bersallioto.

Ve saeudo, sempre a luto

Mi me domando e digo: a gò el virus intestinae o ea Rebi Rovigo ea s’è drio farneo vegnere? A so’ sempre sarà in tel gabineto dal giorno che s’è finio el campionato.

A gò deciso de rompare el sienzio stampa in t’un dì che restarà memorabie: parchè se fin Mateo Sclosa el decide de ‘ndare dai Neri…. voe propio dire che ea dirigenza…………………………………………………………….. zio me desbatezo!

Ve saeudo co’ profonda tristuria, Omo de rebi

come s’è chea va ea vita? Posso, co’ afeto, ciamarla Susana Tuta Pana? A penso che in te ‘sto momento ‘sta vita ea sia un fià dureta… Zio poemica! Ma ea me senta un fià qua: mi a aprezo anca che ea ea vaga de qua e deà, che ea sta in società a fare dei lavureti, noa vorà mina metarse anca a fare e puizie in sede, ahn???? Però, ea me ‘scolta un secondin, mi a ghe consillio de zercare qualchedun che’l possa darghe ‘na man, zio brasoea! Parchè inveze de darghe dò schei a tuti i fioi e sbassarghe anca el stipendio a Schinca Bruneo (chea strazona che seo semo fato scapare!) no se dà qualche scheeto a uno che’l sapia fare el tim menager de profession? Uno bravo, insoma, uno che’l sapia cossa fare. Su su, ‘ndemo, se ea ea se circonda de zente professionae… forse ea vien fora daea cuora dove chea s’è cascà in te ‘sto momento. Parchè, gheo digo co’ sincerità, ea zente noa s’è mina massa feice, saea? Anca se ‘desso ea se mete a confermare de tuto e de più. Ea se domanda parchè prima i ghe voeva tuti ben e ‘desso un fià de manco….

No ea poe star lì da soea a fare ea regina del casteo, ea me ‘scolta, Susana Tuta Pana. A ea ghe serve dea zente competente vizin. Cussì magari saea…. magari anca un sponsorin bein el vien anca fora… parchè anca ‘sta cioda dei schei ea sta in piè soeo fin a un certo punto. Zio Schinca!

Ea saeudo, Omo de rebi

TRADUZIONE DAL DIALETTO ALL’ITALIANO AD OPERA DEL PROFESSOR ODINO BRAZZOROTTO, DOCENTE DI FILOLOGIA ROMANZA PRESSO L’UNIVERSITA’ CA’ FOSCARI DI VENEZIA.

Gentile signora Susanna,

come va la vita? Posso, con affetto, chiamarla Susanna Tutta Panna? Penso che in questo momento questa vita risulti un po’ dura…. zio polemica! Ma mi ascolti un po’: io apprezzo anche che lei vada di qua e di là, che stia in società a fare dei lavoretti, non vorrà mica mettersi anche a fare le pulizie in sede, perdio????? Però, mi ascolti un secondo, le consiglio di cercare qualcuno che possa darle una mano, zio braciola! Perchè invece di dare due soldi a tutti i ragazzi, abbassare anche lo stipendio a Schinca Brunello (quella stracciona! Ce lo siamo fatto scappare!) non si dà qualche soldino a uno che sappia fare il team menager di professione? Uno bravo, insomma, uno che sappia cosa fare. Su su, andiamo, se si circonda di gente professionale…. forse fuoriesce dalle difficoltà dov’è caduta in questo momento. Perchè, glielo dico con sincerità, la gente non è mica tanto felice, sa? Anche adesso che si mette a confermare di tutto e di più. Si domandi perchè prima le volevano tutti bene e adesso un po’ meno….

Non può star lì sola a fare la regina del castello. Mi ascolti, Susanna Tutta Panna. A lei serve della gente competente vicino. Così magari sa… anche un piccolo sponsor interessante salta fuori…. perchè anche questa faccenda dei soldi sta in piedi fino ad un certo punto. Zio Schinca!

La saluto, Omo de rebi

RISO CO’ EA TRIDUUUUURA

I ingredienti

Brosin de carne o de gaina (anca padovana, ghe sta sempre ben)

150 grami de riso (Maratelli o Balilla… Balilla… zio senti che roba)

Tri ovi

90 grami de parmigiano (anca queo in onore del sior Cavinato)

Sae

Noce moscata

Ea preparazion

Missiare in te ‘na terineta i ovi e el parmigiano-Cavinato. Zontare el sae e, chi ca voe, ea noce moscata. Finchè se fa ‘sta roba, se gà da cusinare el riso in te l’oio beo boente e quando che se gà cavà tuto dal fogo, cazarghe drento el paston de ovi e parmigiano-Cavinato (che’l se ciama ”triduuuuura”, insoma… paston!).

Se consillia: imbriagarse co’ un biancheto morbido, come un Pinò bianco, un Tocai o un Siardonè dee Coine Moreniche. Fare ‘na triduuuuuuura de chei armari quatro stajoni del Viadana, se possibie.

Ve saeudo, Omo de rebi

I ingredienti

1 chio de mele cotonie bee mature e un meon viadanese

500 grami de zucaro

Esenza de senape (quanto ca s’in voe)

Ea preparazion

Cavarghe ea pee ae mele cotonie, cavarghe el torsoeo e tajarle a fetine. Verzare e tajare anca el meon (viadanese). Missiare tuto col zucaro. Bona lì, ‘assare riposare par un dì intiero! Po, el dì dopo, scoeare el sughin, farlo adensare par diese minuti e zontarlo de novo ae mele cotonie e al meon (viadanese).

‘Assare passare de novo un dì e ripetare ea stessa operazion… E po’ de novo…. far passare un dì! Se no se s’è deventà veci cucchi, far bojere insieme sughin e fetine de mele cotonie e de meon (viadanese), soeo par qualche minutin.

Quando ca l’è tuto a posto e el paston se gà rafredà, sgnacarghe l’esenza de senape.

Se consillia: de bevare un vineo bianco. Ma sopratuto al Comune de Viadana de cambiare el carteo “Viadana cità del rebi” in “Viadana cità del meon (viadanese)”.

Ve saeudo, Omo de rebi

Insoma, se taca ae siè e meza!

E speremo ben.

Quando ca se dise ‘vere i zebedei, quando ca se dise ‘vere cuore, quando ca se dise ‘vere i Bersallieri ca ne fa soniare… Mi a penso soeo che a Bruneo e ai sui se gabia da intitoeare ‘na via, ‘na piaza, un slargo, un vicoeo, no eo so… qualcossa, insoma.

Partimo da chea meta de chea caja che s’è Legorin, che un median de mischia come ‘sto fioeo qua se cata col lanternin. E chel mato de Basson che’l coreva a destra e a sinistra e in mezo e de qua e de à zercando un buso par pasare in mezo a chei armaroni quatro staioni de gondolari che no i ne faseva passare gnan a morire dopo ‘verne anca impenio de stramusoni par tuta ea partia…. gninte…. ma el mato i gà fati deventar insemenii a forza de piroeare avanti e indrè…. E cossa dire del Germano Reae, pecà soeo che col piè no’l sia sta massa feice, ma co’ chei busi, co’ chee azion… ‘na roa soprafina, sempre al posto giusto in tel momento giusto, co’ ‘na voia de vinzare dea madona de so santoea… E come ea metemo co’ Luca Maoni? Ciò, a digo… zio Niù Siland! Luca Maoni, mina bisi! Queo l’è l’omo più resistente dea tera: el zoga da setembre e no’l gà un cedimento… un leon, ma un leon inrabià, un leon fiero e orgollioso!  Ca’ ghe s’è meza Europa ca neo voe ciavare e lù el sta qua a dare l’anema! E el toso sicueo? E chea belva del Favarin? Mi no so… a dovaria dire dò, tre robete par oniuno, ma e lagreme dea zente de Rovigo e basta par dimostrare ea passion e ea gratitudione verso ‘sti tosi rossi è blè in tei muscoi e in tel cuore.

Ve ringrazio.

Ve saeudo, Omo de rebi emozionà come quando ca l’era zovane….